ARGAZKI ELKARRIZKETA

Atal honetan, eskola bizipenei buruzko hausnarketa bat egitea planteatu zaigu, gaur egun dugun maisu-maistra identitatearen eraikuntzan eragina izaten duelako. Horretarako, Haur Hezkuntzan ikasten genueneko argazkiak edo garai hartan egiten genituen jarduerak gogoratzen dizkigun argazkiak hartu eta hausnartu ditugu. Horretarako ondorengo bi galdera hauek erantzun behar izan ditugu:

1. Zeintzuk dira nire haur hezkuntza etapa konfiguratzen dituzten argazkiak?
2. Nola eragin dit orain dudan maisu-maistra irudia sortzen?

1. ARGAZKIA:

Lehenengo argazki honetan, Haur Hezkuntzako 2. mailako gelako ikasleak ageri gara. Denak bi ilaratan gaude kokatuak, bata bestearen ondoan. Horrek, ikasleen arteko errespetua erakusten du. Horrez gain, haien ondoan irakaslea dago eserita, ikasle eta irakaslearen arteko harreman ona adieraziz. 

Horrez gain, irudiaren atzealdean jostailuzko etxe bat ageri da. Gogoratzen dudanaren arabera, bertan aritzen ginen jolasean, egitazko etxe bat balitz bezala. Jolasean, haurrek haien gorputza garatzeko aukera izaten dute, garapen psikomotorra habian jartzen da. Jarduera hori oso garrantzitsua da haurrek etorkizuneko oinarriak finkatzen bait dira haurren lehenengo urteetan.

Beraz, argazki honetatik maistra irudiaren inguruan atera dudan ideia nagusia da irakasleak ikasleen maila berean egoten saiatu behar duela. Hartara, haurrek jarrera baikorragoa izango dute eta egoera berriei aurre egiteko iniziatiba handiagoa izango dute.

2. ARGAZKIA:

Bigarren argazki honetan plastilinarekin egindako bi irudi ageri dira: hortzak garbitzeko eskuila eta xaboia. Argazki honen bitartez haur hezkuntzan egiten genituen irudi ezberdinak adierazi nahi izan ditut. Txikitan, asko gustatzen zitzaidan plastilinarekin jolastea, hainbat kolore erabiliz forma ezberdinak irudikatzea.

Horrek jolas sinbolikora bultzatzen gaitu, objektu batzuekin errealitateko beste gauza edo egoera ezberdinak errepresentatzea. Jolas sinbolikoa adin honetan ezinbestekoa da, haurren adimena eta sormena garatzen laguntzen bait du.

Beti ere, egiten dituzten edonolako jardueretan irakasleren bat zaintzan egotea komeni da, ezustekoen edo arazoren bat baldin badago lagundu ahal izateko.

3. ARGAZKIA:

Hirugarren argazki honetan, Donostiako danborrada eguneko aitzakiarekin, tamborra jotzen ageri gara. Arropari dagokionean, denak berdin jantzita gaude: niki txuri bat, galtza ilunak, txapela eta danborra.

Txapela, guk egin genuen gelan. Kartulina txuri bat eman ziguten tenedore eta kutxararen formekin. Guk tarte horiek urdinez margotu behar izan genituen; hartara, gure marrazketarako gaitasunak garatuz.

Beraz, irakasle moduan atera dezakedan ideia nagusia da haurrentzat baliagarria dela euskal kultura ezagutzea eta lantzea, damnorradaren kasuan ikus daitekeen bezala. 

4. ARGAZKIA:

Laugarren argazki honetan pegatina txikiak ageri dira, kolore eta forma ezberdinetakoak. Honekin, Haur Hezkuntzan zehar erabiltzen genituen gometxak errepresentatu nahi izan ditut, orain aipatu bezala, kolore, tamaina eta forma ezberdinetako gometxak.

Honek ere haurren imajinazioa eta sormena garatzen laguntzen du. Baina horrez gain, forma geometrikoen izenak ikasten joaten dira pixkanaka-pixkanaka: karratuak, borobilak, triangeluak... Beraz, honek irakasle moduan dudan irudiarekiko egiten didan ekarpena da, jolastuz haurrek gauza asko ikasten dituztela. Era honen bitartez, gauzak errazago barneratzen dituzte, iniziatiba handiagoa izaten dute.

5. eta 6. ARGAZKIAK:

Irudi honetan ikus daitekeen bezalaxe, inauteri garaia da. Eskola garaian, urtero inauteriak ospatzen dituzte, maila guztietan: Haur Hezkuntzako lehen mailatik DBHko azken mailara arte. Ostiralean ospatzen da eta emanaldiak egiten dituzte egun osoan zehar: goizean DBHko ikasleek eta arratsaldean gazteenek.

Mozorroak egiteko orduan, ezinbestekoa izaten da gurasoen papera. Jantziaren zati errazenak ikasleek egiten dituzte gelan, bigarren argazkiko tiranteen eta sudurren kasuan bezalaxe, irakasleen laguntzarekin beti ere. Arropari dagokionean, hor sartzen da gurasoen papera, haiek laguntzen diete etxean jantziak aukeratzen.

Emanaldi hauek antolatzeaz irakasleak arduratzen dira. Haurrentzat oso baliagarriak izaten dira dantzak eta antzezlanak egiterakoan erritmoa eta gorputzaren mugimenduak lantzen dituztelako.

7. ARGAZKIA:

Zazpigarren argazki honetan hartz panpina bat ikus dezakegu. Panpina hau nire txikitako panpina den arren, adierazi nahi izan dudana txikitan etxera eramaten genuen panpinarena da. HH5. mailan, astero ikasle batek etxera eramaten zuen, astebukaera berekin pasatzeko. Nire kasuan, tximino txiki bat zen, beso luzekoa, eskuak lotuz zintzilika eraman genezakeena.

Argazki hau aberasgarria iruditu zait, jarduera honen bitartez, ikasleen erantzukizuna asko lantzen delako. Panpina ostiralean etxera eraman behar izaten dute zaintzeko, eta astelehenean berriz bueltan itzuli, ahaztu gabe. Azken finean, nire iritziz irakasleek sustatu nahi dutena da haurren ardura da, etorkizun batean norbait zaindu behar badute pixkanaka ohitura hor lantzen hasteko.

8. ARGAZKIA:

Zortzigarren irudi honetan ikus daitekeen bezalaxe, San Tomas jaia ospatzen ari gara eskolan. urtero bezalaxe. Horretarako, baserritar jantzia janzten dugu eta azoka bat prestatzen dute eskolan bertan: baratzeko jakiekin, ahuntzak, oiloak, untxiak... Azoka ikusi ondoren, emanaldi bat izaten da eta bertan gabonetako abestiak kantatzen ditugu, laster izaten bait dira gabonak.

Beraz, irakasleei buruzko irudiari lotuta, oso garrantzitsua izaten da beraien lana dena antolatzen dutelako. Baina horrez gain, aurreko argazkiren batean aipatu dudan moduan, haurrei euskal kultura transmititzen diete: antzina nola janzten ziren, euskal gabon kantak, euskal ohiturak...

9. eta 10. ARGAZKIAK:

Azkeneko bi argazki hauetan, bederatzigarrenean eta hamargarrenean, txikitan egiten genituen irudiak ikus ditzakegu. Lehen argazkia kurtsoan egiten genituen marrazkien bilduma da. Hiruhilabetea amaitzean, denbora horretan zehar egindako marrazkiak koaderno batean biltzen zituzten irakasleek eta etxera eramaten genituen gurasoek ikus zitzaten eta nahi zuenak oroitzapen moduan gordetzeko.

Bigarren argazkian gu ageri gara aurrean, baina batez ere atzeko paretean dauden argazkietan zentratuko naiz oraingoan. Bertan, klaseetan zehar egiten genituen marrazkiak ageri dira. Irakasleak, Ana izenekoak, paretean ipintzen zituen. Horrela, gelan nolabaiteko goxotasuna transmititzen da, gela erakargarriagoa egiten da eta haurren jarrera ere positiboagoa bihurtuko da.